Ilinniagaqarnersiutit pillugit Inatsisartut peqqussutaata allanngortinneqarneranik Inatsisartut peqqussutaat nr. 5, 23. maj 2000-imeersoq. (erniat aamma sullissinermut akiliutit)

 

§ 1.

Ilinniagaqarnersiutit pillugit Inatsisartut peqqussutaanni nr. 3, 2. maj 1996-imeersumi imatut allanngortitsisoqassaaq:

1. § 14 imatut oqaasertalerneqassaaq:
"§ 14. Naalakkersuisut pissutsit immikkut ittut pisariaqalersippassuk, taarsigassarsialik allakkatigut nalunaarfigissavaat:
1) tamakkiisumik ilaannakuusumilluunniit ernialersuinerit unitsinneqartut.
2) tamakkiisumik ilaannakuusumilluunniit ernialiussaareersut isumakkeerneqartut.
Imm. 2. Naalakkersuisut ilinniagaqarnermut atatillugu taarsigassarsiat nunap karsianit aningaasalersorneqartut ernialersorneqarnerat pillugu maleruagassanik annertunerusunik aalajangersaasinnaapput."

2. § 25 imatut oqaasertalerneqassaaq:
"§ 25. Ilinniagaqarnersiutit pillugit maleruagassat Ilinniagaqarnersiuteqartitsivimmit allaffissornikkut aqunneqarput. Naalakkersuisut allallugit isumaqatigiissuteqartoqareerneratigut ilinniagaqarnersiutit allaffissornikkut aqunneqarnerat suliffeqarfimmut namminersortumut suliassanngortissinnaavaat.
Imm. 2. Naalakkersuisut ilinniagaqarnersiutit pillugit maleruagassat allaffissornikkut aqunneqarnerat pillugu malerugassanik erseqqinnerusunik aalajangersaasinnaapput.
Imm. 3. Ilinniagaqarnersiutit tapiissutinik tigusisartup Kalaallit Nunaanni Danmarkimiluunniit aningaaserivimmi kontuanut akiliutigineqartassapput."

3. § 25-ip kingornanut ikkunneqassaaq:
"§ 25a. Naalakkersuisut akilersuutinut akilerneqartussanngortunut akilerneqarnissaannut eqqaasitsissutinik nassiussuinermut atatillugu akileeqqusinermi sullissinermut akiliutissat akileqqusinnaavaat. Sullissinermut akiliutissat annertussusiat aningaasanut inatsimmi aalajangersarneqassaaq. 2000-imi sullissinermut akiliutissat akileeqqusinermut ataatsimut 200 kr.-upput. Akilersuutinut akilerneqartussanngortunut akileeqqusilluni eqqaasitsinermi amerlanerpaamik pingasoriarluni sullissinermut akiliummik akileeqqusisoqartassaaq."

 

§ 2.

Inatsisartut peqqussutaat ulloq 1. juni 2000-imi atuutilerpoq.

 

Namminersornerullutik Oqartussat ulloq 23. maj 2000

 

Jonathan Motzfeldt

/

Lise Lennert